Ek shiishaa hai ki har patthar se Takaraataa huun main

Click On Image For Large Size View

Shaayar-e-fitarat huun main jab fikr farmaataa huun main

Ruuh ban kar zarre-zarre mein samaa jaataa huun main

Aa ki tujh bin is tarah ai dost ghabaraataa huun main

Jaise har shay mein kisii shay kii kamii paataa huun main

Jis qadar afasaanaa-e-hastii ko doharaataa huun main

Aur bhii begaanaa-e-hastii huaa jaataa huun main

Jab makaan-o-laamakaan sab se guzar jaataa huun main

Allah-allaah tujh ko Khud apanii jagah paataa huun main

Haaye rii majabuuriyaan tark-e-mohabbat ke liye

Mujh ko samajhaate hain wo aur un ko samajhaataa huun main

Merii himmat dekhanaa merii tabiiyat dekhanaa

Jo sulajh jaatii hai gutthii phir se ulajhaataa huun main

Husn ko kyaa dushmanii hai ishq ko kyaa bair hai

Apane hii qadamon kii Khud hii thokaren khaataa huun main

Terii mahafil tere jalve phir taqaazaa kyaa zaruur

Le uthaa jaataa huun zaalim le chalaa jaataa huun main

Waah re shauq-e-shahaadat kuu-e-qaatil kii taraf

Gun-gunaataa raqs karataa jhumataa jaataa huun main

Dekhanaa us ishq kii ye turfaakaarii dekhanaa

Wo jafaa karate hain mujh par aur sharmaataa huu.N mai.n

Ek dil hai aur tuufaan-e-havaadis ai "Jigar"

Ek shiishaa hai ki har patthar se Takaraataa huun main

Jigar Muradabadi

{shaayar-e-fitarat:poet of nature; fikr farmaanaa:express a thoughts; afasaanaa-e-hastii:tale of life; begaanaa-e-hastii:unrelated to life ; tark-e-mohabbat : to give up love; gutthii : knot (problem);shauq-e-shahaadat: love/desire for martyrdom; kuu-e-qaatil: killer's (lover's) lane; raqs:dance ; tuufaan-e-havaadis:storm of misfortunes}