Maa ro pari hai sar ko meray choomti hui

Chehray pay apna dast-e-karam pherti hui
Maa ro pari hai sar ko meray choomti hui

Aab kitney din raho gay, meray paas tum yahan
Thakti nahi hai mujh sey yeh, puchti hui

Rehti hai jaagti woh, meri neend key liye
Bachon ko mujh sey door paray, rokti hui

Bey chain hai woh kaisey, merey chain key liye
Aatey huwey dinno ka safar sochti hui

Kehti hai kaisey kat-ti hai, pardes main teri
Ankhon say apney ashk rawaan ponchti hui

Har baar puuchti hai key, kis kaam par ho tum
Faakir wo sakht haath merey dekhti hui